BLOGGER TEMPLATES AND TWITTER BACKGROUNDS »

Tuesday, March 15, 2011



Leka Main Iban tu diambi ari bup ti dikarang Anthony Richard, lalu Jaku Ansah tu ditulis A. Alli  Majang…tuju leka main tu ditulis dalam blog aku tu laban deka bekongsi enggau bala anembiak ke bukai ambi ke sama bekongsi penemu tentang leka main bansa kitai empu…
JAKU ANSAH
Nya alai tu ai telesai
Tu datai ari sungai pandi
Indai Raja Petara,
Ai sempuli tanah nyadi
Diberi Sempeti Api
Dikumbai kitai Allah Taala.
Nya alai lalu dipie dara tinggi
Dalam pendi periuk temaga,
Lalu diinsap dara nelap
Enggau lipat kain kesumba.
Udahnya lalu dituang
Sida Endun Kumang
Dalam balang jebul segala,
Lalu perenchit ka aku mimit
Dalam cubit cawan bebunga.
Nya alai dipeda tak lejah-lejah
Nengah kelasah anchau sana,
Ngensara ka mua kita
Ngensara ka tugung bala.
Nya alai tu ko aku,
Ai bungai mentapu bunga,
Ai keduka ayam raja
Ending lumor satu pemadu bias,
Teleba ngerebah ka gajah jelu singa,
Munyi ka ngekah leka buah bindang.
Nya alai tug a ending teleba
Kena aku ngansah terinting
Puting dabong saleka,
Enggi nuan, unggal,
Ngambi ke nuan bejaku
Inggar didinga nusoi rita,
Awak ke munyi ke ninga
Ke geruda kapal perang.


0 ulasan:

Related Posts with Thumbnails